مزہ تھا ہم کو جو لیلیٰ سے دو بہ دو کرتے

مزہ تھا ہم کو جو لیلیٰ سے دو بہ دو کرتے

کہ گل تمہاری بہاروں میں آرزو کرتے

مزے جو موت کے عاشق بیاں کبھو کرتے

مسیح و خضر بھی مرنے کی آرزو کرتے

غرض تھی کیا ترے تیروں کو آب پیکاں سے

مگر زیارت دل کیوں کہ بے وضو کرتے

عجب نہ تھا کہ زمانے کے انقلاب سے ہم

تیمم آب سے اور خاک سے وضو کرتے

اگر یہ جانتے چن چن کے ہم کو توڑیں گے

تو گل کبھی نہ تمنائے رنگ و بو کرتے

سمجھ یہ دار و رسن تار و سوزن اے منصور

کہ چاک پردہ حقیقت کا ہیں رفو کرتے

یقیں ہے صبح قیامت کو بھی صبوحی کش

اٹھیں گے خواب سے ساقی سبو سبو کرتے

نہ رہتی یوسف کنعاں کی گرمئ بازار

مقابلے میں جو ہم تجھ کو روبرو کرتے

چمن بھی دیکھتے گلزار آرزو کی بہار

تمہاری باد بہاری میں آرزو کرتے

سراغ عمر گزشتہ کا کیجئے گر ذوقؔ

تمام عمر گزر جائے جستجو کرتے

maza tha ham ko jo laila se do ba do karte

ke gul tumhari baharon mein arzu karte

maze jo maut ke ashiq bayan kabhu karte

masih-o-khizr bhi marne ki arzu karte

gharaz thi kya tire tiron ko ab paikan se

magar ziyarat dil kyun ke be wuzu karte

ajab na tha ke zamane ke inqilab se ham

tayammum ab se aur khak se wuzu karte

agar ye jante chun chun ke ham ko torenge

tu gul kabhi na tamanna-e-rang-o-bu karte

samajh ye dar-o-rasan tar-o-sozan ai mansur

ke chak-e-parda haqiqat ka hain rafu karte

yaqin hai subh-e-qayamat ko bhi sabuhi kash

uthenge khwab se saqi subu subu karte

na rahti yusuf-e-kanan ki garmi-e-bazar

muqable mein jo ham tujh ko rubaru karte

chaman bhi dekhte gulzar-e-arzu ki bahar

tumhari bad-e-bahari mein arzu karte

suragh-e-umr-e-guzishta ka kijiye gar zauq

tamam umr guzar jae justuju karte