مزے عشق کے کچھ وہی جانتے ہیں

مزے عشق کے کچھ وہی جانتے ہیں

کہ جو موت کو زندگی جانتے ہیں

شب وصل لیں ان کی اتنی بلائیں

کہ ہمدم مرے ہاتھ ہی جانتے ہیں

نہ ہو دل تو کیا لطف آزار و راحت

برابر خوشی ناخوشی جانتے ہیں

جو ہے میرے دل میں انہیں کو خبر ہے

جو میں جانتا ہوں وہی جانتے ہیں

پڑا ہوں سر زم میں دم چرائے

مگر وہ اسے بے خودی جانتے ہیں

کہاں قدر ہم جنس ہم جنس کو ہے

فرشتوں کو بھی آدمی جانتے ہیں

کہوں حال دل تو کہیں اس سے حاصل

سبھی کو خبر ہے سبھی جانتے ہیں

وہ نادان انجان بھولے ہیں ایسے

کہ سب شیوۂ دشمنی جانتے ہیں

نہیں جانتے اس کا انجام کیا ہے

وہ مرنا میرا دل لگی جانتے ہیں

سمجھتا ہے تو داغؔ کو رند زاہد

مگر رند اس کو ولی جانتے ہیں

maze ishq ke kuchh wahi jante hain

ke jo maut ko zindagi jante hain

shab-e-wasl len un ki itni balaen

ke hamdam mire hath hi jante hain

na ho dil to kya lutf-e-azar-o-rahat

barabar khushi nakhushi jante hain

jo hai mere dil mein unhen ko khabar hai

jo main janta hun wahi jante hain

para hun sar-e-zam mein dam-e-churae

magar wo use be khudi jante hain

kahan qadr ham jins ham jins ko hai

farishton ko bhi admi jante hain

kahun hal-e-dil to kahin us se hasil

sabhi ko khabar hai sabhi jante hain

wo nadan anjan bhule hain aise

ke sab shewa-e-dushmani jante hain

nahin jante us ka anjam kya hai

wo marna mera dil lagi jante hain

samajhta hai to dagh ko rind-e-zahid

magar rind us ko wali jante hain