مست سحر و توبہ کناں شام کا ہوں میں

مست سحر و توبہ کناں شام کا ہوں میں

قاضی کے گرفتار نت اعلام کا ہوں میں

بندہ کہو خادم کو چاکر کہو مجھ کو

جو کچھ کہو سو ساقیٔ گلفام کا ہوں میں

خدمت میں مجھے عشق کی ہے دل سے ارادت

نے معتقد کفر نہ اسلام کا ہوں میں

یک روز حلال اس کو بھی میں کر کے نہ کھایا

نوکر جو خرابات میں دو جام کا ہوں میں

نے فکر ہے دنیا کی نہ دیں کا متلاشی

اس ہستئ موہوم میں کس کام کا ہوں میں

یک رنگ ہوں آتی نہیں خوش مجھ کو دو رنگی

منکر سخن و شعر میں ایہام کا ہوں میں

مطلوب دعا حق میں نہیں اپنے کسو کی

طالب لب محبوب سے دشنام کا ہوں میں

بندہ ہے خدا کا تو یقیں کر کہ بتاں کا

بندہ یہ جہاں بے زر و بے دام کا ہوں میں

ہے شیشۂ مے عینک پیری مجھے سوداؔ

نظارہ کن اب شیب کے ایام کا ہوں میں

mast-e-sahar-o-tauba kunan sham ka hun main

qazi ke giraftar nit aalam ka hun main

banda kaho khadim ko chakar kaho mujh ko

jo kuchh kaho so saqi-e-gulfam ka hun main

khidmat mein mujhe ishq ki hai dil se iradat

ne motaqid-e-kufr na islam ka hun main

yak roz halal us ko bhi main kar ke na khaya

naukar jo kharabat mein do jam ka hun main

ne fikr hai duniya ki na den ka mutalashi

is hasti-e-mauhum mein kis kam ka hun main

yak rang hun ati nahin khush mujh ko do rangi

munkir sukhan-o-sher mein iham ka hun main

matlub dua haq mein nahin apne kisu ki

talib lab mahbub se dushnam ka hun main

banda hai khuda ka to yaqin kar ke butan ka

banda ye jahan be zar-o-be dam ka hun main

hai shisha-e-mai ainak piri mujhe sauda

nazzara kin ab sheb ke ayyam ka hun main