مانی نے جو دیکھا تری تصویر کا نقشہ

مانی نے جو دیکھا تری تصویر کا نقشہ

سب بھول گیا اپنی وہ تحریر کا نقشہ

اس ابروئے خم دار کی صورت سے عیاں ہے

خنجر کی شباہت دم شمشیر کا نقشہ

کیا گردش ایام ہے اے آہ جگر سوز

الٹا نظر آیا تری تاثیر کا نقشہ

دن رات ترے کوچے میں رووے ہے ہمیشہ

عاشق کے یہ ہے منصب و جاگیر کا نقشہ

تدبیر تو کچھ بن نہیں آتی ہے نظیرؔ آہ

اب دیکھیے کیا ہوتا ہے تقدیر کا نقشہ

mani ne jo dekha tiri taswir ka naqsha

sab bhul gaya apni wo tahrir ka naqsha

is abru-e-kham dar ki surat se ayan hai

khanjar ki shabahat dam-e-shamshir ka naqsha

kya gardish-e-ayyam hai ai ah-e-jigar soz

ulta nazar aya tiri tasir ka naqsha

din rat tire kuche mein rowe hai hamesha

ashiq ke ye hai mansab-o-jagir ka naqsha

tadbir to kuchh ban nahin ati hai nazir ah

ab dekhiye kya hota hai taqdir ka naqsha