مت مردمک دیدہ میں سمجھو یہ نگاہیں

مت مردمک دیدہ میں سمجھو یہ نگاہیں

ہیں جمع سویداۓ دل چشم میں آہیں

کس دل پہ ہے عزم صف مژگان خود آرا

آئینے کے پایاب سے اتری ہیں سپاہیں

دیر و حرم آئینۂ تکرار تمنا

واماندگی شوق تراشے ہے پناہیں

جوں مردمک چشم سے ہوں جمع نگاہیں

خوابیدہ بہ حیرت کدۂ داغ ہیں آہیں

پھر حلقۂ کاکل میں پڑیں دید کی راہیں

جوں دود فراہم ہوئیں روزن میں نگاہیں

پایا سر ہر ذرہ جگر گوشۂ وحشت

ہیں داغ سے معمور شقائق کی کلاہیں

یہ مطلع اسدؔ جوہر افسون سخن ہو

گر عرض تپاک جگر سوختہ چاہیں

حیرت کش یک جلوۂ معنی ہیں نگاہیں

کھینچوں ہوں سویداۓ دل چشم سے آہیں

mat mardumak-e-dida mein samjho ye nigahen

hain jama suwaida-e-dil-e-chashm mein ahen

kis dil pe hai azm-e-saf-e-mizhgan-e-khud ara

aine ke payab se utri hain sipahen

dair-o-haram aina-e-takrar-e-tamanna

wamandagi-e-shauq tarashe hai panahain

jun mardumak-e-chashm se hun jama nigahen

khwabida ba hairat kada-e-dagh hain ahen

phir halqa-e-kakul mein paren did ki rahen

jun dud faraham huin rauzan mein nigahen

paya sar har zarra jigar gosha-e-wahshat

hain dagh se maamur shaqaiq ki kulahen

ye matlaa asad jauhar-e-afsun-e-sukhan ho

gar arz-e-tapak-e-jigar sokhta chahen

hairat kash-e-yak jalwa-e-maani hain nigahen

khinchun hun suwaida-e-dil-e-chashm se ahen