متاعِ بےبہا ہے درد و سوزِ آرزومندی

متاعِ بےبہا ہے درد و سوزِ آرزومندی

مقام بندگی دے کر نہ لوں شانِ خداوندی

ترے آزاد بندوں کی نہ یہ دنیا، نہ وہ دنیا

یہاں مرنے کی پابندی، وہاں جینے کی پابندی

حجاب اِکسیر ہے آوارۂ کوئے محبّت کو

مِری آتش کو بھڑکاتی ہے تیری دیر پیوندی

گزر اوقات کر لیتا ہے یہ کوہ و بیاباں میں

کہ شاہیں کے لیے ذلّت ہے کارِ آشیاں‌بندی

یہ فیضانِ نظر تھا یا کہ مکتب کی کرامت تھی

سِکھائے کس نے اسمٰعیلؑ کو آدابِ فرزندی

زیارت‌گاہِ اہلِ عزم و ہمّت ہے لحَد میری

کہ خاکِ راہ کو میں نے بتایا رازِ الوندی

مِری مشّاطگی کی کیا ضرورت حُسنِ معنی کو

کہ فطرت خود بخود کرتی ہے لالے کی حِنابندی

mata-e-bebaha hai dard-o-soz-e-arzumandi

maqam-e-bandagi de kar na lun shan-e-khudawandi

tire azad bandon ki na ye duniya, na wo duniya

yahan marne ki pabandi, wahan jine ki pabandi

hijab iksir hai awara-e-ku-e-mohabbat ko

miri atish ko bharakiti hai teri der paiwandi

guzar auqat kar leta hai ye koh-o-bayaban mein

ke shahin ke liye zillat hai kar-e-ashiyanbandi

ye faizan-e-nazar tha ya ke maktab ki karamat thi

sikhae kis ne ismail ko adab-e-farzandi

ziyaratgah-e-ahl-e-azm-o-himmat hai lahad meri

ke khak-e-rah ko main ne bataya raz-e-alwndi

miri mashshatagi ki kya zarurat husn-e-maani ko

ke fitrat khud bakhud karti hai lale ki hinabandi