ماہ نو

ٹُوٹ کر خورشید کی کشتی ہوئی غرقابِ نیل

ایک ٹکڑا تیرتا پھرتا ہے رُوئے آبِ نیل

طشتِ گردُوں میں ٹپکتا ہے شفَق کا خونِ ناب

نشترِ قُدرت نے کیا کھولی ہے فصدِ آفتاب

چرخ نے بالی چُرا لی ہے عروسِ شام کی

نیل کے پانی میں یا مچھلی ہے سیمِ خام کی

قافلہ تیرا رواں بے منّتِ بانگِ درا

گوشِ انساں سُن نہیں سکتا تری آوازِ پا

گھٹنے بڑھنے کا سماں آنکھوں کو دِکھلاتا ہے تُو

ہے وطن تیرا کدھر، کس دیس کو جاتا ہے تُو

ساتھ اے سیّارۂ ثابت نما لے چل مجھے

خارِ حسرت کی خلش رکھتی ہے اب بے کل مجھے

نور کا طالب ہوں، گھبراتا ہوں اس بستی میں مَیں

طفلکِ سیماب پا ہوں مکتبِ ہستی میں مَیں

tut kar khurshid ki kashti hui gharqab-e-nil

ek tukra tairta phirta hai ru-e-ab-e-nil

tasht-e-gardun mein tapakta hai shafaq ka khun-e-nab

nashtar-e-qudrat ne kya kholi hai fasd-e-aftab

charkh ne bali chura li hai urus-e-sham ki

nil ke pani mein ya machhli hai sim-e-kham ki

qafila tera rawan be minnat-e-bang-e-dara

gosh-e-insan sun nahin sakta tiri awaz-e-pa

ghatne barhne ka saman ankhon ko dikhlata hai tu

hai watan tera kidhar, kis des ko jata hai tu

sath ai sayyara-e-sabit numa le chal mujhe

khar-e-hasrat ki khalish rakhti hai ab be kal mujhe

nur ka talib hun, ghabrata hun is basti mein main

tiflak-e-simab pa hun maktab-e-hasti mein main