مجلس عیش گرم ہو یارب — سراج اورنگ آبادی (Siraj Aurangabadi)

مجلس عیش گرم ہو یارب

یار اگر ہووے شمع بزم طرب

خون دل آنسوؤں میں صرف ہوا

گر گئی یہ بھری گلابی سب

مہر ہے داغ غم سیں دل کی برات

نقد دیدار ہے ہماری طلب

چاہئے زاہدوں کوں حجرۂ تنگ

باغ عاشق ہے وسعت مشرب

دل مرا ہے ترے تغافل سیں

عندلیب گل بہار غضب

دل کی جاگیر ہے جمال آباد

جب سیں پایا ہے عشق کا منصب

نہ ملے جب تلک وصال اس کا

تب تلک فوت ہے مرا مطلب

گل کی مانند مت پریشاں ہو

بند کر مثل غنچہ اپنے لب

شمع و پروانہ سیں سنا ہے سراجؔ

صدق دل سیں ادب ہے ترک ادب