مجھ سیں غم دست و گریباں نہ ہوا تھا سو ہوا — سراج اورنگ آبادی (Siraj Aurangabadi)

مجھ سیں غم دست و گریباں نہ ہوا تھا سو ہوا

چاک سینے کا نمایاں نہ ہوا تھا سو ہوا

اب تلک مجھ کوں کسی شخص کے چہرہ کا خیال

صورت آئنۂ جاں نہ ہوا تھا سو ہوا

صف عشاق میں کوئی ثانیٔ مجنوں مجھ سا

وحشی کوہ و بیاباں نہ ہوا تھا سو ہوا

اشک اولے ہو برستے ہیں مرے دامن میں

یہ ورق نقرۂ افشاں نہ ہوا تھا سو ہوا

خنجر عشق نے احسان کیا سر پہ مرے

جان کندن کبھی آساں نہ ہوا تھا سو ہوا

قبلہ رو رحم کیا مجھ پہ خط آغازی میں

کافر ہند مسلماں نہ ہوا تھا سو ہوا

آہ سوزاں سیں مرے دامن صحرا میں سراجؔ

قبر مجنوں پہ چراغاں نہ ہوا تھا سو ہوا