لاؤں وہ تنکے کہیں سے آشیانے کے لیے

لاؤں وہ تنکے کہیں سے آشیانے کے لیے

بجلیاں بے تاب ہوں جن کو جَلانے کے لیے

وائے ناکامی، فلک نے تاک کر توڑا اُسے

میں نے جس ڈالی کو تاڑا آشیانے کے لیے

آنکھ مل جاتی ہے ہفتاد و دو ملّت سے تری

ایک پیمانہ ترا سارے زمانے کے لیے

دل میں کوئی اس طرح کی آرزو پیدا کروں

لوٹ جائے آسماں میرے مٹانے کے لیے

جمع کر خرمن تو پہلے دانہ دانہ چُن کے تُو

آ ہی نکلے گی کوئی بجلی جلانے کے لیے

پاس تھا ناکامیِ صیّاد کا اے ہم صفیر

ورنہ مَیں، اور اُڑ کے آتا ایک دانے کے لیے!

اس چمن میں مرغِ دل گائے نہ آزادی کا گیت

آہ! یہ گُلشن نہیں ایسے ترانے کے لیے

laun wo tinke kahin se ashiyane ke liye

bijliyan be tab hun jin ko jalane ke liye

wae nakami, falak ne tak kar tora use

main ne jis dali ko tara ashiyane ke liye

ankh mal jati hai haftad-o-do millat se tiri

ek paimana tira sare zamane ke liye

dil mein koi is tarah ki arzu paida karun

laut jae asman mere mitane ke liye

jama kar khirman to pahle dana dana chun ke tu

a hi niklegi koi bijli jalane ke liye

pas tha nakami-e-sayyad ka ai ham safir

warna main, aur ur ke ata ek dane ke liye!

is chaman mein murgh-e-dil gae na azadi ka git

ah! ye gulshan nahin aise tarane ke liye