قطرۂ مے بسکہ حیرت سے نفَس پرور ہوا

قطرۂ مے بسکہ حیرت سے نفَس پرور ہوا

خطِّ جامِ مے سراسر رشتۂ گوہر ہوا

اعتبارِ عشق کی خانہ خرابی دیکھنا

غیر نے کی آہ لیکن وہ خفا مجھ پر ہوا

گرمیِ دولت ہوئی آتش زنِ نامِ نکو

خانۂ ماتم میں یاقوتِ نگیں اخگر ہوا

نشّے میں گُم کردہ رہ آیا وہ مستِ فتنہ خو

آج رنگِ رفتہ دورِ گردشِ ساغر ہوا

درد سے در پردہ دی مژگاں سیاہاں نے شکست

ریزہ ریزہ استخواں کا پوست میں نشتر ہوا

اے بہ ضبطِ حال خو نا کردگاں جوشِ جنوں

نشّۂ مے ہے اگر یک پردہ نازک تر ہوا

زُہد گر دیدن ہے گِردِ خانہ ہائے منعماں

دانۂ تسبیح سے میں مہرہ در ششدر ہوا

اس چمن میں ریشہ واری جس نے سر کھینچا اسدؔ

تر زبانِ شکرِ لطفِ ساقیِ کوثر ہوا

qatra-e-mai baske hairat se nafas parwar hua

khat-e-jam-e-mai sarasar rishta-e-gauhar hua

etibar-e-ishq ki khana kharabi dekhna

ghair ne ki ah lekin wo khafa mujh par hua

garmi-e-daulat hui atish zan-e-nam-e-nako

khana-e-matam mein yaqut-e-nagin akhgar hua

nashe mein gum karda rah aya wo mast-e-fitna khu

aj rang-e-rafta daur-e-gardish-e-saghar hua

dard se dar parda di mizhgan siyahan ne shikast

reza reza ustukhwan ka post mein nashtar hua

ai ba zabt-e-hal khu na kardgan josh-e-junun

nasha-e-mai hai agar yak parda nazuk tar hua

zohd gar didin hai gird-e-khana hae munaman

dana-e-tasbih se main mohra dar shashdar hua

is chaman mein resha wari jis ne sar khincha asad

tar zaban-e-shukr-e-lutf-e-saqi-e-kausar hua