قول تیرا شوق میرا چاہیئے

قول تیرا شوق میرا چاہیئے

جھوٹ سچ کے واسطے کیا چاہیئے

ہو سکے کیا اپنی وحشت کا علاج

تیرے کوچے میں بھی صحرا چاہیئے

گو تری نظروں سے کل گر ہی پڑیں

آج تو کوئی سہارا چاہیئے

ہر طرف ہے تیرے بیماروں کا شور

ہر گلی میں اک مسیحا چاہیئے

کیوں نہ چھائے مے کشوں کے سر پر ابر

کچھ گنہ گاروں کا پردہ چاہیئے

کاش دے کر کچھ گرہ سے ہو نجات

تجھ کو زاہد دین و دنیا چاہیئے

کیوں نہیں دیتے تسلی داغؔ کو

اس سے لیجے گر تمنا چاہیئے

qaul tera shauq mera chahiye

jhut sach ke waste kya chahiye

ho sake kya apni wahshat ka ilaj

tere kuche mein bhi sahra chahiye

go tiri nazron se kal gar hi paren

aj to koi sahara chahiye

har taraf hai tere bimaron ka shor

har gali mein ik masiha chahiye

kyun na chhae mai kashon ke sar par abr

kuchh gunah garon ka parda chahiye

kash de kar kuchh girah se ho najat

tujh ko zahid din-o-duniya chahiye

kyun nahin dete tasalli dagh ko

us se lije gar tamanna chahiye