قید اور قید بھی تنہائی کی

قید اور قید بھی تنہائی کی

شرم رہ جائے شکیبائی کی

سوجھتا کیا ہمیں ان آنکھوں سے

شرط تھی قلب کی بینائی کی

در بت خانہ سے بڑھنے ہی نہ پائے

گرچہ اک عمر جبیں سائی کی

قیس کو ناقۂ لیلیٰ نہ ملا

گو بہت بادیہ پیمائی کی

ہم نے ہر ذرہ کو محمل پایا

ہے یہ قسمت ترے صحرائی کی

وقف ہے اس کے لیے جان عزیز

کعبہ کے خادم و شیدائی کی

کعبہ و قدس میں گھر کیا یہ بھی

اک ادا ہے مرے ہرجائی کی

نظر آیا ہمیں ہر چیز میں تو

اس پہ یہ دھوم ہے یکتائی کی

عشق اور جور ستم گر کا گلہ

حد ہے اے دل یہی رسوائی کی

عشق کو ہم نے کیا نذر جنوں

عمر بھر میں یہی دانائی کی

کر گئی زندۂ جاوید ہمیں

تیغ قاتل نے مسیحائی کی

ہو نہ تقلید دلا مقتل میں

کہیں موسیٰ سے تمنائی کی

نہ سہی تیغ تجلی ہی سہی

آنکھ جھپکے نہ تماشائی کی

کل کو ہے پھر وہی زنداں جوہرؔ

ٹھیک کیا آپ سے سودائی کی

qaid aur qaid bhi tanhai ki

sharm rah jae shakebai ki

sujhta kya hamen in ankhon se

shart thi qalb ki binai ki

dar but khana se barhne hi na pae

garche ik umr jabin sai ki

qais ko naqa-e-laila na mila

go bahut badiya paimai ki

ham ne har zarra ko mahmil paya

hai ye qismat tire sahrai ki

waqf hai us ke liye jan-e-aziz

kaaba ke khadim-o-shaidai ki

kaaba-o-qudus mein ghar kya ye bhi

ik ada hai mire harjai ki

nazar aya hamen har chiz mein to

us pe ye dhum hai yaktai ki

ishq aur jaur-e-sitam gar ka gila

had hai ai dil yahi ruswai ki

ishq ko ham ne kiya nazr-e-junun

umr bhar mein yahi danai ki

kar gai zinda-e-jawed hamen

tegh-e-qatil ne masihai ki

ho na taqlid dila maqtal mein

kahin musa se tamannai ki

na sahi tegh-e-tajalli hi sahi

ankh jhapke na tamashai ki

kal ko hai phir wahi zindan jauhar

thik kya ap se saudai ki