فقر و راہبی

کچھ اور چیز ہے شاید تری مسلمانی

تری نگاہ میں ہے ایک، فقر و رُہبانی

سکُوں پرستیِ راہب سے فقر ہے بیزار

فقیر کا ہے سفینہ ہمیشہ طوفانی

پسند رُوح و بدن کی ہے وا نمود اس کو

کہ ہے نہایتِ مومن خودی کی عُریانی

وجود صیرفیِ کائنات ہے اُس کا

اُسے خبر ہے، یہ باقی ہے اور وہ فانی

اُسی سے پوچھ کہ پیشِ نگاہ ہے جو کچھ

جہاں ہے یا کہ فقط رنگ و بو کی طُغیانی

یہ فقر مردِ مسلماں نے کھو دیا جب سے

رہی نہ دولتِ سلمانی و سلیمانی

kuchh aur chiz hai shayad tiri musalmani

tiri nigah mein hai ek, faqr-o-rahbani

sukun parasti-e-rahib se faqr hai bezar

faqir ka hai safina hamesha tufani

pasand ruh-o-badan ki hai wa numud us ko

ke hai nihayat-e-momin khudi ki uryani

wajud serfi-e-kainat hai us ka

use khabar hai, ye baqi hai aur wo fani

usi se puchh ke pesh-e-nigah hai jo kuchh

jahan hai ya ke faqat rang-o-bu ki tughyani

ye faqr mard-e-musalman ne kho diya jab se

rahi na daulat-e-sullamani-o-sulaimani