اتری ہے آسماں سے جو کل اٹھا تو لا

اتری ہے آسماں سے جو کل اٹھا تو لا

طاق حرم سے شیخ وہ بوتل اٹھا تو لا

لیلیٰ کے دل میں قیس نکل آئے گی جگہ

تو سر پر آج نجد کا جنگل اٹھا تو لا

دھونا ہے داغ جامۂ احرام صبح صبح

حجرے سے شیخ پانی کی چھاگل اٹھا تو لا

مجھ کو بھی انتظار تھا ابر آئے تو پیوں

ساقی اگر یہ سچ ہے کہ بادل اٹھا تو لا

وہ حسن وضع دیکھیں گے کیوں کر جڑے ہیں دل

زر گر نئی بنی ہے جو ہیکل اٹھا تو لا

طاق حرم میں شیخ گلابی ہے پھول سی

اس کام کا ملے گا تجھے پھل اٹھا تو لا

بن جائے دن یہ تیرہ شب ہجر اے ندیم

روشن تھا جس سے طور وہ مشعل اٹھا تو لا

میں کام لوں گا ابر کا اے رند تان کر

تو مجھ فقیر مست کا کمبل اٹھا تو لا

اے شیخ میز سے دم افطار فرش پر

پینے کو پھول کھانے کو کچھ پھل اٹھا تو لا

ناصح کا منہ ہو بند چکھا دوں شراب خلد

ساقی ذرا ریاضؔ کی بوتل اٹھا تو لا

utri hai asman se jo kal utha to la

taq-e-haram se shaikh wo botal utha to la

laila ke dil mein qais nikal aegi jagah

tu sar par aj najd ka jangal utha to la

dhona hai dagh jama-e-ehram-e-subh subh

hujre se shaikh pani ki chhagal utha to la

mujh ko bhi intizar tha abr ae to piyun

saqi agar ye sach hai ke badal utha to la

wo husn waza dekhenge kyun kar jure hain dil

zar gar nai bani hai jo hikal utha to la

taq-e-haram mein shaikh gulabi hai phul si

is kam ka milega tujhe phal utha to la

ban jae din ye tira shab-e-hijr ai nadim

raushan tha jis se tur wo mashal utha to la

main kam lunga abr ka ai rind tan kar

tu mujh faqir-e-mast ka kambal utha to la

ai shaikh mez se dam-e-iftar farsh par

pine ko phul khane ko kuchh phal utha to la

naseh ka munh ho band chakha dun sharab-e-khuld

saqi zara riyaz ki botal utha to la