فلک نے رنج تیر آہ سے میرے زبس کھینچا

فلک نے رنج تیر آہ سے میرے زبس کھینچا

لبوں تک دل سے شب نالے کو میں نے نیم رس کھینچا

مرے شوخ خراباتی کی کیفیت نہ کچھ پوچھو

بہار حسن کو دی آب اس نے جب چرس کھینچا

رہا جوش بہار اس فصل گر یوں ہی تو بلبل نے

چمن میں دست گلچیں سے عجب رنج اس برس کھینچا

کہا یوں صاحب محمل نے سن کر سوز مجنوں کا

تکلف کیا جو نالہ بے اثر مثل جرس کھینچا

نزاکت رشتہ الفت کی دیکھو سانس دشمن کی

خبردار آرزوؔ ٹک گرم کر تار نفس کھینچا

falak ne ranj tir ah se mere zabas khincha

labon tak dil se shab nale ko main ne nim ras khincha

mire shokh kharabati ki kaifiyat na kuchh puchho

bahar-e-husn ko di ab us ne jab chars khincha

raha josh-e-bahar is fasl gar yun hi to bulbul ne

chaman mein dast-e-gulchin se ajab ranj is baras khincha

kaha yun sahab-e-mahmil ne sun kar soz-e-majnun ka

takalluf kya jo nala-e-be asar misl-e-jaras khincha

nazakat rishta ulfat ki dekho sans dushman ki

khabardar arzu tuk garm kar tar-e-nafas khincha