فرض اور قرض
Zafar Ali Khan (1873–1956)جو مسلم ہے تو جاں ناموس ملت پر فدا کر دے
خدا کا فرض اور اس کے نبی کا قرض ادا کر دے
بھری محفل میں لا سکتا نہ ہو گر کفر تاب اس کی
تو زنداں ہی میں جا کر روشن ایماں کا دیا کر دے
شہادت کی تمنا ہو تو انگریزی حکومت پر
کسی مجلس کے اندر نکتہ چینی برملا کر دے
تمہارا قافلہ کچھ لٹ چکا اور کچھ ہے لٹنے کو
رسول اللہ کو اس کی خبر باد صبا کر دے
ضرورت ہے اب اس ایجاد کی دانائے مغرب کو
جو اہل ہند کے دامن کو چولی سے جدا کر دے
نکل آنے کو ہے سورج کہ مشرق میں اجالا ہو
برس جانے کو ہے بادل کہ گلشن کو ہرا کر دے
قفس کی تیلیوں پر آشیاں کا کاٹ کر چکر
فلک سے گر پڑے بجلی کہ بلبل کو رہا کر دے
یہ ہے پہچان خاصان خدا کی ہر زمانے میں
کہ خوش ہو کر خدا ان کو گرفتار بلا کر دے
jo muslim hai to jan namus-e-millat par fida kar de
khuda ka farz aur us ke nabi ka qarz ada kar de
bhari mahfil mein la sakta na ho gar kufr tab us ki
tu zindan hi mein ja kar raushan iman ka diya kar de
shahadat ki tamanna ho to angrezi hukumat par
kisi majlis ke andar nukta chini barmala kar de
tumhara qafila kuchh lut chuka aur kuchh hai lutne ko
rasul allah ko us ki khabar bad-e-saba kar de
zarurat hai ab is ijad ki dana-e-maghrib ko
jo ahl-e-hind ke daman ko choli se juda kar de
nikal ane ko hai suraj ke mashriq mein ujala ho
baras jane ko hai badal ke gulshan ko hara kar de
qafas ki teliyon par ashiyan ka kat kar chakkar
falak se gir pare bijli ke bulbul ko raha kar de
ye hai pahchan khasan-e-khuda ki har zamane mein
ke khush ho kar khuda un ko giraftar-e-bala kar de