فرشتے آدم کو جنت سے رخصت کرتے ہیں

عطا ہُوئی ہے تجھے روزوشب کی بیتابی

خبر نہیں کہ تُو خاکی ہے یا کہ سیمابی

سُنا ہے، خاک سے تیری نمود ہے، لیکن

تری سرِشت میں ہے کوکبی و مہ تابی

جمال اپنا اگر خواب میں بھی تُو دیکھے

ہزار ہوش سے خوشتر تری شکر خوابی

گِراں بہا ہے ترا گِریۂ سحَر گاہی

اسی سے ہے ترے نخلِ کُہَن کی شادابی

تری نوا سے ہے بے پردہ زندگی کا ضمیر

کہ تیرے ساز کی فطرت نے کی ہے مِضرابی

ata hui hai tujhe rozoshab ki betabi

khabar nahin ke tu khaki hai ya ke simabi

suna hai, khak se teri numud hai, lekin

tiri sarisht mein hai kaukabi-o-mah tabi

jamal apna agar khwab mein bhi tu dekhe

hazar hosh se khushtar tiri shakar khwabi

giran baha hai tira girya-e-sahar gahi

usi se hai tire nakhl-e-kuhan ki shadabi

tiri nawa se hai be parda zindagi ka zamir

ke tere saz ki fitrat ne ki hai mizrabi