عکس پر یوں آنکھ ڈالی جائے گی

عکس پر یوں آنکھ ڈالی جائے گی

سامنے کی چوٹ خالی جائے گی

یہ قیامت بھی نکالی جائے گی

اس گلی سے کھا کے گالی جائے گی

کعبے میں بوتل کھلے موقع کہاں

زمزمی سے آج ڈھالی جائے گی

گل تو کیا ہیں تا قفس اے باد تند

پتہ پتہ ڈالی ڈالی جائے گی

بزم ساقی میں اگر لغزش ہوئی

ہاتھ سے مے کی پیالی جائے گی

گدگدانے کو کف پا دل کے ساتھ

آرزوئے پائمالی جائے گی

وا در توبہ ہے تو جلدی ہے کیا

بات بگڑی کچھ بنا لی جائے گی

مردہ کوئی آرزو اس دل میں ہے

کہہ گئے وہ جان ڈالی جائے گی

میکدے ہم گھر سے جائیں گے ریاضؔ

ایک بوتل ساتھ خالی جائے گی

aks par yun ankh dali jaegi

samne ki chot khali jaegi

ye qayamat bhi nikali jaegi

us gali se kha ke gali jaegi

kaabe mein botal khule mauqaa kahan

zamzami se aj dhali jaegi

gul to kya hain ta qafas ai bad-e-tund

pata pata dali dali jaegi

bazm-e-saqi mein agar laghzish hui

hath se mai ki piyali jaegi

gudgudane ko kaf-e-pa dil ke sath

arzu-e-paimali jaegi

wa dar-e-tauba hai to jaldi hai kya

bat bigri kuchh bana li jaegi

murda koi arzu is dil mein hai

kah gae wo jan dali jaegi

maikade ham ghar se jaenge riyaz

ek botal sath khali jaegi