علم کو پرہیزگاری چاہئے

علم کو پرہیزگاری چاہئے

گلشنوں کو آبیاری چاہئے

سب کو خواہش ہے حکومت کی مگر

ہمتوں میں پائیداری چاہئے

ایک بو کر کاٹتے ہیں جب ہزار

بے زروں کی کشتکاری چاہئے

گرد اونچی ہو کے بنتی ہے غبار

خاکیوں کو خاکساری چاہئے

تخم بوتے ہی نہیں ملتے ثمر

ہر جگہ امیدواری چاہئے

حکمرانوں کے لئے ہے لازمی

یوں تو سب کو رازداری چاہئے

کہہ رہے ہیں تجربے یورپ کے یہ

عورتوں کو پردہ داری چاہئے

عیش کی جا خوش دلی درکار ہے

غم کدے میں سوگواری چاہئے

ختم پر ہر رنج کے جب عیش ہے

عاصیوں کو اشک باری چاہئے

حاکموں کی مہربانی کے لئے

محنت و خدمت گزاری چاہئے

دین و دنیا کی مسرت کے لئے

مرد و زن میں خوش گواری چاہئے

عفو کو حجت سے جب سیفیؔ ہے بغض

خاطیوں کو شرمساری چاہئے

ilm ko parhezgari chahiye

gulshanon ko abiyari chahiye

sab ko khwahish hai hukumat ki magar

himmaton mein paidari chahiye

ek bu kar katte hain jab hazar

be zaron ki kishtkari chahiye

gard unchi ho ke banti hai ghubar

khakiyon ko khaksari chahiye

tukhm bote hi nahin milte samar

har jagah umidwari chahiye

hukmranon ke liye hai lazmi

yun to sab ko razdari chahiye

kah rahe hain tajribe yorap ke ye

auraton ko parda dari chahiye

aish ki ja khush dili darkar hai

gham kade mein sogwari chahiye

khatm par har ranj ke jab aish hai

asiyon ko ashk bari chahiye

hakimon ki mehrbani ke liye

mehnat-o-khidmat guzari chahiye

din-o-duniya ki masarrat ke liye

mard-o-zan mein khush gawari chahiye

afw ko hujjat se jab saifi hai bughz

khatayyon ko sharmsari chahiye