عمر بھر کی تلخ بیداری کا ساماں ہو گئیں

عمر بھر کی تلخ بیداری کا ساماں ہو گئیں

ہائے وہ راتیں کہ جو خواب پریشاں ہو گئیں

میں فدا اس چاند سے چہرے پہ جس کے نور سے

میرے خوابوں کی فضائیں یوسفستاں ہو گئیں

عمر بھر کم بخت کو پھر نیند آ سکتی نہیں

جس کی آنکھوں پر تری زلفیں پریشاں ہو گئیں

دل کے پردوں میں تھیں جو جو حسرتیں پردہ نشیں

آج وہ آنکھوں میں آنسو بن کے عریاں ہو گئیں

کچھ تجھے بھی ہے خبر او سونے والے ناز سے

میری راتیں لٹ گئیں نیندیں پریشاں ہو گئیں

ہائے وہ مایوسیوں میں میری امیدوں کا رنگ

جو ستاروں کی طرح اٹھ اٹھ کے پنہاں ہو گئیں

بس کرو او میری رونے والی آنکھوں بس کرو

اب تو اپنے ظلم پر وہ بھی پشیماں ہو گئیں

آہ وہ دن جو نہ آئے پھر گزر جانے کے بعد

ہائے وہ راتیں کہ جو خواب پریشاں ہو گئیں

گلشن دل میں کہاں اخترؔ وہ رنگ نو بہار

آرزوئیں چند کلیاں تھیں پریشاں ہو گئیں

umr bhar ki talkh bedari ka saman ho gain

hae wo raten ke jo khwab-e-pareshan ho gain

main fida is chand se chehre pe jis ke nur se

mere khwabon ki fazaen yusufsitan ho gain

umr bhar kam bakht ko phir nind a sakti nahin

jis ki ankhon par tiri zulfen pareshan ho gain

dil ke pardon mein thin jo jo hasraten parda nashin

aj wo ankhon mein ansu ban ke uryan ho gain

kuchh tujhe bhi hai khabar o sone wale naz se

meri raten lut gain ninden pareshan ho gain

hae wo mayusiyon mein meri ummidon ka rang

jo sitaron ki tarah uth uth ke pinhan ho gain

bas karo o meri rone wali ankhon bas karo

ab to apne zulm par wo bhi pasheman ho gain

ah wo din jo na ae phir guzar jane ke baad

hae wo raten ke jo khwab-e-pareshan ho gain

gulshan-e-dil mein kahan akhtar wo rang-e-nau bahar

arzuen chand kaliyan thin pareshan ho gain