عقل سے حاصل ہوئی کیا کیا پشیمانی مجھے

عقل سے حاصل ہوئی کیا کیا پشیمانی مجھے

عشق جب دینے لگا تعلیم نادانی مجھے

رنج دے گی باغ رضواں کی تن آسانی مجھے

یاد آئے گا ترا لطف ستم رانی مجھے

میری جانب ہے مخاطب خاص کر وہ چشم ناز

اب تو کرنی ہی پڑے گی دل کی قربانی مجھے

دیکھ لے اب کہیں آ کر جو وہ غفلت شعار

کس قدر ہو جائے مر جانے میں آسانی مجھے

بے نقاب آنے کو ہیں مقتل میں وہ بے شک مگر

دیکھنے کاہے کو دے گی میری حیرانی مجھے

سینکڑوں آزادیاں اس قید پر حسرتؔ نثار

جس کے باعث کہتے ہیں سب ان کا زندانی مجھے

aql se hasil hui kya kya pashemani mujhe

ishq jab dene laga taalim nadani mujhe

ranj degi bagh-e-rizwan ki tan asani mujhe

yad aega tira lutf-e-sitam rani mujhe

meri janib hai mukhatib khas kar wo chashm-e-naz

ab to karni hi paregi dil ki qurbani mujhe

dekh le ab kahin a kar jo wo ghaflat shiar

kis qadar ho jae mar jane mein asani mujhe

be naqab ane ko hain maqtal mein wo be shak magar

dekhne kahe ko degi meri hairani mujhe

sainkron azadiyan is qaid par hasrat nisar

jis ke bais kahte hain sab un ka zindani mujhe