آیا نہ راہ پر وہ ستم گر کسی طرح

آیا نہ راہ پر وہ ستم گر کسی طرح

سیدھا ہوا نہ اپنا مقدر کسی طرح

سر پھوڑیے کہ کھینچیے نالے فراق میں

ہوگا نہ وصل یار میسر کسی طرح

قاتل نے کوششیں تو ہزاروں ہی کیں مگر

نکلا نہ دم مرا تہ خنجر کسی طرح

بدلا لیں ان بتوں سے ستم کا تو خوب ہو

سن لے ہماری داور محشر کسی طرح

وحشت نے لاکھ لاکھ ابھارا ہمیں مگر

چھوڑا نہ ہم نے کوچۂ دلبر کسی طرح

منت بھی کی خوشامدیں بھی کیں ہزار بار

آیا نہ میرے گھر وہ ستم گر کسی طرح

شبنمؔ وہی ہے اس کی کچاوٹ ابھی تلک

بدلے نہ ہم نے یار کے تیور کسی طرح

aya na rah par wo sitam gar kisi tarah

sidha hua na apna muqaddar kisi tarah

sar phoriye ke khinchiye nale firaq mein

hoga na wasl-e-yar muyassar kisi tarah

qatil ne koshishen to hazaron hi kin magar

nikla na dam mira tah-e-khanjar kisi tarah

badla len un buton se sitam ka to khub ho

sun le hamari dawar-e-mahshar kisi tarah

wahshat ne lakh lakh ubhara hamen magar

chhora na ham ne kucha-e-dilbar kisi tarah

minnat bhi ki khushamaden bhi kin hazar bar

aya na mere ghar wo sitam gar kisi tarah

shabnam wahi hai us ki kachot abhi talak

badle na ham ne yar ke tewar kisi tarah