عمل سیں مے پرستوں کے تجھے کیا کام اے واعظ

عمل سیں مے پرستوں کے تجھے کیا کام اے واعظ

شراب شوق کا تو نے پیا نیں جام اے واعظ

لگے گا سنگ خجلت شیشۂ ناموس پر تیرے

عبث ہم بے گناہوں کوں نہ کر بد نام اے واعظ

نہیں ہے امتیاز نیک و بد چشم حقیقت میں

مجھے یکساں ہوا ہے کفر اور اسلام اے واعظ

نیاز بے خودی بہتر نماز خود نمائی سیں

نہ کر ہم پختہ مغزوں سیں خیال خام اے واعظ

کلام نقطۂ علم مختصر ہے سب معانی کا

بیان منطق درسی کوں نیں انجام اے واعظ

وو شیریں لب کی کڑوے بول امرت ہیں مرے حق میں

تجھے معلوم کیا ہے لذت دشنام اے واعظ

سراجؔ اس کعبۂ جاں کے تصور کوں کیا سمرن

یہی ورد سحر ہے اور دعائے شام اے واعظ

amal sin mai paraston ke tujhe kya kam ai waiz

sharab-e-shauq ka tu ne piya nain jam ai waiz

lagega sang khajlat shisha-e-namus par tere

abas ham be gunahon kun na kar bad nam ai waiz

nahin hai imtiyaz-e-nek-o-bad chashm-e-haqiqat mein

mujhe yaksan hua hai kufr aur islam ai waiz

niyaz-e-be khudi behtar namaz-e-khud numai sin

na kar ham pukhta maghzon sin khayal-e-kham ai waiz

kalam nuqta-e-ilm mukhtasar hai sab maani ka

bayan-e-mantiq-e-darsi kun nain anjam ai waiz

wo shirin lab ki karwe bol amrit hain mire haq mein

tujhe maalum kya hai lazzat-e-dushnam ai waiz

siraj is kaaba-e-jan ke tasawwur kun kiya sumran

yahi wird-e-sahar hai aur dua-e-sham ai waiz