عذر آنے میں بھی ہے اور بلاتے بھی نہیں

عذر آنے میں بھی ہے اور بلاتے بھی نہیں

باعث ترک ملاقات بتاتے بھی نہیں

منتظر ہیں دم رخصت کہ یہ مر جائے تو جائیں

پھر یہ احسان کہ ہم چھوڑ کے جاتے بھی نہیں

سر اٹھاؤ تو سہی آنکھ ملاؤ تو سہی

نشۂ مے بھی نہیں نیند کے ماتے بھی نہیں

کیا کہا پھر تو کہو ہم نہیں سنتے تیری

نہیں سنتے تو ہم ایسوں کو سناتے بھی نہیں

خوب پردہ ہے کہ چلمن سے لگے بیٹھے ہیں

صاف چھپتے بھی نہیں سامنے آتے بھی نہیں

مجھ سے لاغر تری آنکھوں میں کھٹکتے تو رہے

تجھ سے نازک مری نظروں میں سماتے بھی نہیں

دیکھتے ہی مجھے محفل میں یہ ارشاد ہوا

کون بیٹھا ہے اسے لوگ اٹھاتے بھی نہیں

ہو چکا قطع تعلق تو جفائیں کیوں ہوں

جن کو مطلب نہیں رہتا وہ ستاتے بھی نہیں

زیست سے تنگ ہو اے داغؔ تو جیتے کیوں ہو

جان پیاری بھی نہیں جان سے جاتے بھی نہیں

uzr ane mein bhi hai aur bulate bhi nahin

bais-e-tark-e-mulaqat batate bhi nahin

muntazir hain dam-e-rukhsat ke ye mar jae to jaen

phir ye ehsan ke ham chhor ke jate bhi nahin

sar uthao to sahi ankh milao to sahi

nasha-e-mai bhi nahin nind ke mate bhi nahin

kya kaha phir to kaho ham nahin sunte teri

nahin sunte to ham aison ko sunate bhi nahin

khub parda hai ke chilman se lage baithe hain

saf chhupte bhi nahin samne ate bhi nahin

mujh se laghar tiri ankhon mein khatakte to rahe

tujh se nazuk miri nazron mein samite bhi nahin

dekhte hi mujhe mahfil mein ye irshad hua

kaun baitha hai use log uthate bhi nahin

ho chuka qat-e-taalluq to jafaen kyun hun

jin ko matlab nahin rahta wo satate bhi nahin

zist se tang ho ai dagh to jite kyun ho

jan pyari bhi nahin jan se jate bhi nahin