عالم یاس میں گھبرائے نہ انسان بہت

عالم یاس میں گھبرائے نہ انسان بہت

دل سلامت ہے تو حسرت بہت ارمان بہت

کاش دو چار ہزاروں میں تو ہوں کافر عشق

ہم نے کعبے میں بھی دیکھے نہ مسلمان بہت

سر اٹھاتا نہیں تو شرم جفا سے ظالم

یا کیے ہیں کسی کم بخت نے احسان بہت

تم کہ بیداد کرو اور نہ شرماؤ ذرا

ہم کہ نا کردہ گنہ اور پشیمان بہت

حسرتیں روز نئی دل میں بھری جاتی ہیں

تھوڑے تھوڑے بھی ہوئے جاتے ہیں مہمان بہت

سوچیے دل میں تو ہے عشق نہایت دشوار

نہ سمجھئے تو یہی کام ہے آسان بہت

بزم احباب میں اے داغؔ کبھی تو ہنس بول

دیکھتے ہیں تجھے ہر وقت پریشان بہت

alam-e-yas mein ghabrae na insan bahut

dil salamat hai to hasrat bahut arman bahut

kash do char hazaron mein to hun kafir-e-ishq

ham ne kaabe mein bhi dekhe na musalman bahut

sar uthata nahin to sharm-e-jafa se zalim

ya kiye hain kisi kam bakht ne ehsan bahut

tum ke bedad karo aur na sharmao zara

ham ke na karda gunah aur pasheman bahut

hasraten roz nai dil mein bhari jati hain

thore thore bhi hue jate hain mehman bahut

sochiye dil mein to hai ishq nihayat dushwar

na samajhiye to yahi kam hai asan bahut

bazm-e-ahbab mein ai dagh kabhi to hans bol

dekhte hain tujhe har waqt pareshan bahut