عبد الرحمن اول کا بویا ہوا کھجور کا پہلا درخت

میری آنکھوں کا نُور ہے تُو

میرے دل کا سُرور ہے تُو

اپنی وادی سے دُور ہوں مَیں

میرے لیے نخلِ طُور ہے تُو

مغرب کی ہوا نے تجھ کو پالا

صحرائے عرب کی حُور ہے تُو

پردیس میں ناصبور ہوں مَیں

پردیس میں ناصبُور ہے تو

غُربت کی ہوا میں باروَر ہو

ساقی تیرا نمِ سحَر ہو

عالَم کا عجیب ہے نظارہ

دامانِ نِگہ ہے پارہ پارہ

ہمّت کو شناوری مبارک!

پیدا نہیں بحر کا کنارہ

ہے سوزِ دُروں سے زندگانی

اُٹھتا نہیں خاک سے شرارہ

صُبحِ غُربت میں اور چمکا

ٹُوٹا ہُوا شام کا ستارہ

مومن کے جہاں کی حد نہیں ہے

مومن کا مقام ہر کہیں ہے

meri ankhon ka nur hai tu

mere dil ka surur hai tu

apni wadi se dur hun main

mere liye nakhl-e-tur hai tu

maghrib ki hawa ne tujh ko pala

sahra-e-arab ki hur hai tu

pardes mein nasabur hun main

pardes mein nasabur hai tu

ghurbat ki hawa mein barwar ho

saqi tera nam-e-sahar ho

alam ka ajib hai nazara

daman-e-nigah hai para para

himmat ko shinawari mubarak!

paida nahin bahr ka kinara

hai soz-e-duron se zindagani

uthta nahin khak se sharara

subh-e-ghurbat mein aur chamka

tuta hua sham ka sitara

momin ke jahan ki had nahin hai

momin ka maqam har kahin hai