عبد القادر کے نام

اُٹھ کہ ظلمت ہوئی پیدا اُفقِ خاور پر

بزم میں شعلہ نوائی سے اُجالا کر دیں

ایک فریاد ہے مانندِ سپند اپنی بساط

اسی ہنگامے سے محفل تہ و بالا کر دیں

اہلِ محفل کو دِکھا دیں اثرِ صَیقلِ عشق

سنگِ امروز کو آئینۂ فردا کر دیں

جلوۂ یوسفِ گُم گشتہ دِکھا کر ان کو

تپش آمادہ تر از خُونِ زلیخا کر دیں

اس چمن کو سبق آئینِ نُمو کا دے کر

قطرۂ شبنمِ بے مایہ کو دریا کر دیں

رختِ جاں بُت کدۂ چیں سے اُٹھا لیں اپنا

سب کو محوِ رُخِ سُعدیٰ و سُلیمیٰ کر دیں

دیکھ! یثرِب میں ہُوا ناقۂ لیلیٰ بیکار

قیس کو آرزوئے نَو سے شناسا کر دیں

بادہ دیرینہ ہو اور گرم ہو ایسا کہ گداز

جگرِ شیشہ و پیمانہ و مِینا کر دیں

گرم رکھتا تھا ہمیں سردیِ مغرب میں جو داغ

چِیر کر سینہ اُسے وقفِ تماشا کر دیں

شمع کی طرح جیِیں بزم گہِ عالم میں

خود جلیں، دیدۂ اغیار کو بینا کر دیں

“ہر چہ در دل گُذرد وقفِ زباں دارد شمع

سوختن نیست خیالے کہ نہاں دارد شمع”

uth ke zulmat hui paida ufuq-e-khawar par

bazm mein shola nawai se ujala kar den

ek fariyad hai manind-e-sapnad apni bisat

isi hangame se mahfil tah-o-bala kar den

ahl-e-mahfil ko dikha den asar-e-saiqal-e-ishq

sang-e-imroz ko aina-e-farda kar den

jalwa-e-yusuf-e-gum gashta dikha kar un ko

tapish amada tar az khun-e-zulekha kar den

is chaman ko sabaq ain-e-numu ka de kar

qatra-e-shabnam-e-be maya ko dariya kar den

rakht-e-jan but kada-e-chin se utha len apna

sab ko mahw-e-rukh-e-soda-o-sulema kar den

dekh! yasrab mein hua naqa-e-laila bekar

qais ko arzu-e-nau se shanasa kar den

bada derina ho aur garm ho aisa ke gudaz

jigar-e-shisha-o-paimana-o-mina kar den

garm rakhta tha hamen sardi-e-maghrib mein jo dagh

chir kar sina use waqf-e-tamasha kar den

shama ki tarah jyin bazm gah-e-alam mein

khud jalen, dida-e-aghyar ko bina kar den

"har cha dar-e-dil guzrad waqf-e-zaban darad shama

sokhtan nist khiille ke nihan darad shama"