اب آئے ہو صدا سن کر گجر کی

اب آئے ہو صدا سن کر گجر کی

کہو جی شب کہاں تم نے بسر کی

سحر کو دفن کر کے جائیے گا

مصیبت اور ہے اک رات بھر کی

قفس میں بند کرنا تھا جو تقدیر

ندامت کیوں مجھے دی بال و پر کی

گزر جائے گی جو گزرے گی ہم پر

چلو جی راہ لو تم اپنے گھر کی

ابھی تو جان لے لے اے غم عشق

مصیبت کون اٹھائے عمر بھر کی

خدا کے واسطے یارو سنبھالو

کہ پھر شدت ہوئی درد جگر کی

ترشح آنسوؤں کا ہو رہا ہے

گھٹا امڈی ہوئی ہے چشم تر کی

نہ بولیں گے تمہارے خوف سے ہم

ہلائیں گے مگر زنجیر در کی

نہ آنا تم اجازت مانگنے کو

نہ دکھلانا ہمیں صورت سفر کی

کوئی دم کا بکھیڑا رہ گیا ہے

جگر تک برچھیاں پہنچیں نظر کی

ہمیں فصاد کا منہ دیکھنا ہے

اٹھانی ہے مصیبت نیشتر کی

حباب آسا ہے لطف زندگانی

حقیقت کچھ نہیں ہوتی بشر کی

نسیمؔ اب دل کتاں کی طرح ہے چاک

محبت میں کسی رشک قمر کی

ab ae ho sada sun kar gajar ki

kaho ji shab kahan tum ne basar ki

sahar ko dafn kar ke jaiyega

musibat aur hai ik rat bhar ki

qafas mein band karna tha jo taqdir

nadamat kyun mujhe di bal-o-par ki

guzar jaegi jo guzregi ham par

chalo ji rah lo tum apne ghar ki

abhi to jan le le ai gham-e-ishq

musibat kaun uthae umr bhar ki

khuda ke waste yaro sambhalo

ke phir shiddat hui dard-e-jigar ki

tarashshoh ansuon ka ho raha hai

ghata umdi hui hai chashm-e-tar ki

na bolenge tumhare khauf se ham

hilaenge magar zanjir-e-dar ki

na ana tum ijazat mangne ko

na dikhlana hamen surat safar ki

koi dam ka bakhera rah gaya hai

jigar tak barchhiyan pahunchen nazar ki

hamen fassad ka munh dekhna hai

uthani hai musibat neshtar ki

habab asa hai lutf-e-zindagani

haqiqat kuchh nahin hoti bashar ki

nasim ab dil katan ki tarah hai chak

mohabbat mein kisi rashk-e-qamar ki