عشق طینت میں فرومایہ نہیں مثلِ ہوَس

عشق طینت میں فرومایہ نہیں مثلِ ہوَس

پرِ شہباز سے ممکن نہیں پروازِ مگَس

یوں بھی دستورِ گُلستاں کو بدل سکتے ہیں

کہ نشیمن ہو عنادل پہ گراں مثلِ قفَس

سفر آمادہ نہیں منتظرِ بانگِ رحیل

ہے کہاں قافلۂ موج کو پروائے جرَس!

گرچہ مکتب کا جواں زندہ نظر آتا ہے

مرُدہ ہے، مانگ کے لایا ہے فرنگی سے نفَس

پرورِش دل کی اگر مدِّ نظر ہے تجھ کو

مردِ مومن کی نگاہِ غلط انداز ہے بس!

ishq tinat mein faromaya nahin misl-e-hawas

par-e-shahbaz se mumkin nahin parwaz-e-magas

yun bhi dastur-e-gulistan ko badal sakte hain

ke nasheman ho anadil pe giran misl-e-qafas

safar amada nahin muntazir-e-bang-e-rahil

hai kahan qafila-e-mauj ko parwae jaras!

garche maktab ka jawan zinda nazar ata hai

murda hai, mang ke laya hai farangi se nafas

parwarish dil ki agar mad-e-nazar hai tujh ko

mard-e-momin ki nigah-e-ghalat andaz hai bas!