طریق عشق میں مجھ کو کوئی کامل نہیں ملتا

طریق عشق میں مجھ کو کوئی کامل نہیں ملتا

گئے فرہاد و مجنوں اب کسی سے دل نہیں ملتا

بھری ہے انجمن لیکن کسی سے دل نہیں ملتا

ہمیں میں آ گیا کچھ نقص یا کامل نہیں ملتا

پرانی روشنی میں اور نئی میں فرق اتنا ہے

اسے کشتی نہیں ملتی اسے ساحل نہیں ملتا

پہنچنا داد کو مظلوم کا مشکل ہی ہوتا ہے

کبھی قاضی نہیں ملتے کبھی قاتل نہیں ملتا

حریفوں پر خزانے ہیں کھلے یاں ہجر گیسو ہے

وہاں پہ بل ہے اور یاں سانپ کا بھی بل نہیں ملتا

یہ حسن و عشق ہی کا کام ہے شبہ کریں کس پر

مزاج ان کا نہیں ملتا ہمارا دل نہیں ملتا

چھپا ہے سینہ و رخ دل ستاں ہاتھوں سے کروٹ میں

مجھے سوتے میں بھی وہ حسن سے غافل نہیں ملتا

حواس و ہوش گم ہیں بحر عرفان الٰہی میں

یہی دریا ہے جس میں موج کو ساحل نہیں ملتا

کتاب دل مجھے کافی ہے اکبرؔ ؔدرس حکمت کو

میں اسپنسر سے مستغنی ہوں مجھ سے مل نہیں ملتا

tariq-e-ishq mein mujh ko koi kamil nahin milta

gae farhad-o-majnun ab kisi se dil nahin milta

bhari hai anjuman lekin kisi se dil nahin milta

hamen mein a gaya kuchh naqs ya kamil nahin milta

purani raushni mein aur nai mein farq itna hai

use kashti nahin milti use sahil nahin milta

pahunchna dad ko mazlum ka mushkil hi hota hai

kabhi qazi nahin milte kabhi qatil nahin milta

harifon par khazane hain khule yan hijr gesu hai

wahan pe bal hai aur yan sanp ka bhi bal nahin milta

ye husn-o-ishq hi ka kam hai shuba karen kis par

mizaj un ka nahin milta hamara dil nahin milta

chhupa hai sina-o-rukh dil sitan hathon se karwat mein

mujhe sote mein bhi wo husn se ghafil nahin milta

hawas-o-hosh gum hain bahr irfan-e-ilahi mein

yahi dariya hai jis mein mauj ko sahil nahin milta

kitab-e-dil mujhe kafi hai akbar dars-e-hikmat ko

main aspnasr se mustaghni hun mujh se mil nahin milta