شکوہ نہیں کسی کی ملاقات کا مجھے

شکوہ نہیں کسی کی ملاقات کا مجھے

تم جانتے ہو وہم ہے جس بات کا مجھے

جانا کہ بوئے غیر یہ پہچان جائے گا

باسی نہ اس نے ہار دیا رات کا مجھے

مل کر تمام بھید کہوں گا رقیب سے

آتا ہے خوب توڑ تری گھات کا مجھے

ڈرنا کسی کا اور وہ بجلی کا کوندنا

موسم بہت پسند ہے برسات کا مجھے

آخر وہاں رقیب نے نقشہ جما لیا

اے داغؔ خوف تھا اسی بد ذات کا مجھے

shikwa nahin kisi ki mulaqat ka mujhe

tum jante ho wahm hai jis bat ka mujhe

jana ke bu-e-ghair ye pahchan jaega

basi na us ne har diya rat ka mujhe

mil kar tamam bhed kahunga raqib se

ata hai khub tor tiri ghat ka mujhe

darna kisi ka aur wo bijli ka kaundna

mausam bahut pasand hai barsat ka mujhe

akhir wahan raqib ne naqsha jama liya

ai dagh khauf tha isi bad zat ka mujhe