شکوہ جو میرا اشک میں ڈھلتا چلا گیا

شکوہ جو میرا اشک میں ڈھلتا چلا گیا

سارا غبار دل کا نکلتا چلا گیا

روشن کیا امید نے یوں جادۂ حیات

ہر گام پہ چراغ سا جلتا چلا گیا

راس آ سکی سکوں کو نا تدبیر ضبط غم

آنکھوں سے خون دل کا ابلتا چلا گیا

جس پر مرے فریب تمنا کو ناز تھا

وہ دن بھی انتظار میں ڈھلتا چلا گیا

پچھلے پہر جو شمع نے کھینچی اک آہ سرد

چہرے کا ان کے رنگ بدلتا چلا گیا

بڑھنے لگی یقین و گماں میں جو کشمکش

وعدہ بھی صبح و شام پہ ٹلتا چلا گیا

وہ نوحۂ الم ہو کہ نیرؔ نوائے شوق

ہر نغمہ ایک ساز میں ڈھلتا چلا گیا

shikwa jo mera ashk mein dhalta chala gaya

sara ghubar-e-dil ka nikalta chala gaya

raushan kiya umid ne yun jada-e-hayat

har gam pe charagh sa jalta chala gaya

ras a saki sukun ko na tadbir zabt-e-gham

ankhon se khun-e-dil ka ubalta chala gaya

jis par mire fareb-e-tamanna ko naz tha

wo din bhi intizar mein dhalta chala gaya

pichhle pahar jo shama ne khinchi ik ah-e-sard

chehre ka un ke rang badalta chala gaya

barhne lagi yaqin-o-guman mein jo kashmakash

waada bhi subh-o-sham pe talta chala gaya

wo nauha-e-alam ho ke nayyar nawa-e-shauq

har naghma ek saz mein dhalta chala gaya