Arooz is now on the App Store, for iPhone and iPad. Download →

All poetry

صنم خوش طبعیاں سیکھے ہو تم کن کن ظریفوں سیں

Siraj Aurangabadi (1712–1764)

صنم خوش طبعیاں سیکھے ہو تم کن کن ظریفوں سیں

کہ یہ لطف ادا معلوم ہوتا ہے لطیفوں سیں

لکھوں وصف اس کی زلفوں کے قلم کر شاخ سنبل کوں

دواتوں میں سیاہی بھر گل شبو کی قیفوں سیں

تری سیدھی نگاہیں ان دنوں میں گرم الفت ہیں

مجھے سیفی لگی ہے ہات کئی ورد اور وظیفوں سیں

خیال اس کا ہم آغوش نظر ہے سات پردوں میں

عجب شوخی سیں پیش آیا ہے یہ شوخ ان عفیفوں سیں

کہاں پاے مزے کے اس قدر اس نے بڑے کوئی

تری آنکھوں کوں سو درجے شرافت ہی شریفوں سیں

ہجوم بو الہوس کے شمع مجلس ہو سو کیا معنی

لطیفوں کوں روا نیں اختلاط ایسے کثیفوں سیں

مزاجیں نا موافق ہوں تو کب صحبت برآر ہوئے

نہیں ملتی ہماری طبع ان دنیا کے جیفوں سیں

عبث مت دیکھ آنکھیں پھاڑ پھاڑ ان چشم خونیں کوں

پڑا نیں نرگس باغی تجھے کام ان حریفوں سیں

خس و خاشاک رہ ہیں ہم ترے اے شعلہ خو ظالم

مناسب نیں ہے اتنی سرکشی آخر ضعیفوں سیں

سبک روحان معنی بوئے گل ہیں باغ عرفاں کے

ہر اک خار گراں جاں کوں خبر کیا ان لطیفوں سیں

غلط نیں ہے کہ بلبل حافظ سیپارۂ گل ہے

سند رکھتا ہوں میں گلبرگ کے رنگیں صحیفوں سیں

رقیب اس سنگ دل سیں منتظر ہیں ہم کلامی کے

سخن کرتا ہے کب وو کوہ تمکیں ان خفیفوں سیں

سوار توسن معنی ہوں چوگان طبیعت سیں

لیا ہوں گوئے میدان سخن میں ہم ردیفوں سیں

ادیب عشق کے شاگرد ہیں فرہاد اور مجنوں

کہ کوہ و دشت کا مکتب ہے گرم ان دو خلیفوں سیں

سراجؔ اس شمع کوں ہے شوق پروانے جلانے کا

دعا کر یا الٰہی موم دل ہوئے ہم نجیفوں سیں