صدمہ ہر چند ترے جور سے جاں پر آیا

صدمہ ہر چند ترے جور سے جاں پر آیا

تس پہ شکوہ نہ کبھی میری زباں پر آیا

راست کیشوں کی تف آہ سے ڈر اے سرکش

تیر پھرتا نہیں جس وقت نشاں پر آیا

موسم شیب میں بے فائدہ ہے لعب شباب

کب ثمر دیوے ہے جو نخل خزاں پر آیا

دل پر خوں کو مرے غنچۂ تصویر کی طرح

لب وا شد نہ کبھی راز نہاں پر آیا

چشم انجم پہ نہیں ابر سے وہ روز سیاہ

جو مرے دیدۂ خوں ناب چکاں پر آیا

رات کو دیکھ کے اے ماہ تجھے غیر کے ساتھ

طعنہ زن دل کا مرے گل کے کتاں پر آیا

ہو کے استاد دبستان سخن میں سوداؔ

شعر کے قاعدہ دانان جہاں پر آیا

sadma har chand tire jaur se jan par aya

tis pe shikwa na kabhi meri zaban par aya

rast keshon ki taf-e-ah se dar ai sarkash

tir phirta nahin jis waqt nishan par aya

mausam-e-sheb mein be faida hai laab shabab

kab samar dewe hai jo nakhl-e-khizan par aya

dil pur khun ko mire ghuncha-e-taswir ki tarah

lab-e-wa shud na kabhi raz-e-nihan par aya

chashm-e-anjum pe nahin abr se wo roz-e-siyah

jo mire dida-e-khun nab chakan par aya

rat ko dekh ke ai mah tujhe ghair ke sath

taana zan dil ka mire gul ke katan par aya

ho ke ustad dabistan-e-sukhan mein sauda

sher ke qaida danan jahan par aya