شمار سبحہ، “مرغوبِ بتِ مشکل” پسند آیا

شمار سبحہ، “مرغوبِ بتِ مشکل” پسند آیا

تماشائے بہ یک کف بُردنِ صد دل، پسند آیا

بہ فیضِ بے دلی، نومیدیِ جاوید آساں ہے

کشائش کو ہمارا عقدۂ مشکل پسند آیا

ہوائے سیرِ گل، آئینۂ بے مہریِ قاتل

کہ اندازِ بخوں غلطیدنِ بسمل پسند آیا

ہوئی جس کو بہارِ فرصتِ ہستی سے آگاہی

برنگِ لالہ، جامِ بادہ بر محمل پسند آیا

سوادِ چشمِ بسمل انتخابِ نقطہ آرائی

خرامِ نازِ بے پروائیِ قاتل پسند آیا

روانی ہائے موجِ خونِ بسمل سے ٹپکتا ہے

کہ لطفِ بے تحاشا رفتنِ قاتل پسند آیا

اسدؔ ہر جا سخن نے طرحِ باغِ تازہ ڈالی ہے

مجھے رنگِ بہار ایجادیِ بیدلؔ پسند آیا

shumar-e-subha, "marghub-e-but-e-mushkil" pasand aya

tamashae ba yak kaf burdan-e-sad dil, pasand aya

ba faiz-e-be dili, naumidi-e-jawed asan hai

kushaish ko hamara uqda-e-mushkil pasand aya

hawa-e-sair-e-gul, aina-e-be mehri-e-qatil

ke andaz-e-bakhon ghalatidin-e-bismil pasand aya

hui jis ko bahar-e-fursat-e-hasti se agahi

barang-e-lala, jam-e-bada bar mahmil pasand aya

sawad-e-chashm-e-bismil intikhab-e-nuqta arai

khiram-e-naz-e-be purwai-e-qatil pasand aya

rawani hae mauj-e-khun-e-bismil se tapakta hai

ke lutf-e-be tahasha raftan-e-qatil pasand aya

asad har ja sukhan ne tarah-e-bagh-e-taza dali hai

mujhe rang-e-bahar ijadi-e-bedil pasand aya