آہ کو چاہیے اک عمر اثر ہوتے تک

آہ کو چاہیے اک عمر اثر ہوتے تک

کون جیتا ہے تری زلف کے سر ہوتے تک

دام ہر موج میں ہے حلقۂ صد کام نہنگ

دیکھیں کیا گزرے ہے قطرے پہ گہر ہوتے تک

عاشقی صبر طلب اور تمنا بیتاب

دل کا کیا رنگ کروں خون جگر ہوتے تک

تا قیامت شب فرقت میں گزر جائے گی عمر

سات دن ہم پہ بھی بھاری ہیں سحر ہوتے تک

ہم نے مانا کہ تغافل نہ کرو گے لیکن

خاک ہو جائیں گے ہم تم کو خبر ہوتے تک

پرتو خور سے ہے شبنم کو فنا کی تعلیم

میں بھی ہوں ایک عنایت کی نظر ہوتے تک

یک نظر بیش نہیں فرصت ہستی غافل

گرمیٔ بزم ہے اک رقص شرر ہوتے تک

غم ہستی کا اسدؔ کس سے ہو جز مرگ علاج

شمع ہر رنگ میں جلتی ہے سحر ہوتے تک

ah ko chahiye ik umr asar hote tak

kaun jita hai tiri zulf ke sar hote tak

dam har mauj mein hai halqa-e-sad kam-e-nahang

dekhen kya guzre hai qatre pe guhar hote tak

ashiqi sabr talab aur tamanna betab

dil ka kya rang karun khun-e-jigar hote tak

ta qayamat shab-e-furqat mein guzar jaegi umr

sat din ham pe bhi bhari hain sahar hote tak

ham ne mana ke taghaful na karoge lekin

khak ho jaenge ham tum ko khabar hote tak

partau-e-khur se hai shabnam ko fana ki taalim

main bhi hun ek inayat ki nazar hote tak

yak nazar besh nahin fursat-e-hasti ghafil

garmi-e-bazm hai ik raqs-e-sharar hote tak

gham-e-hasti ka asad kis se ho juz marg ilaj

shama har rang mein jalti hai sahar hote tak