شاہیں

کِیا میں نے اُس خاک داں سے کنارا

جہاں رزق کا نام ہے آب و دانہ

بیاباں کی خلوت خوش آتی ہے مجھ کو

ازل سے ہے فطرت مری راہبانہ

نہ باد بہاری، نہ گُلچیں، نہ بُلبل

نہ بیماریِ نغمۂ عاشقانہ

خیابانیوں سے ہے پرہیز لازم

ادائیں ہیں ان کی بہت دلبرانہ

ہوائے بیاباں سے ہوتی ہے کاری

جواں مرد کی ضربتِ غازیانہ

حمام و کبوتر کا بھُوکا نہیں مَیں

کہ ہے زندگی باز کی زاہدانہ

جھپٹنا، پلٹنا، پلٹ کر جھپٹنا

لہُو گرم رکھنے کا ہے اک بہانہ

یہ پورب، یہ پچھم چکوروں کی دنیا

مِرا نیلگوں آسماں بیکرانہ

پرندوں کی دُنیا کا درویش ہوں مَیں

کہ شاہیں بناتا نہیں آشیانہ

kiya main ne us khak dan se kinara

jahan rizq ka nam hai ab-o-dana

bayaban ki khalwat khush ati hai mujh ko

azal se hai fitrat miri rahibana

na bad-e-bahari, na gulchin, na bulbul

na bimari-e-naghma-e-ashiqana

khiyabaniyon se hai parhez lazim

adaen hain un ki bahut dilbarana

hawa-e-bayaban se hoti hai kari

jawan mard ki zarbat-e-ghazyana

hammam-o-kabutar ka bhuka nahin main

ke hai zindagi baz ki zahidana

jhapatna, palatna, palat kar jhapatna

lahu garm rakhne ka hai ik bahana

ye purab, ye pachchham chakoron ki duniya

mira nilgun asman bekrana

parindon ki duniya ka darwesh hun main

ke shahin banata nahin ashiyana