سوز و گداز عشق کا لذت چشیدہ ہوں

سوز و گداز عشق کا لذت چشیدہ ہوں

مانند آبلہ ہمہ تن آب دیدہ ہوں

گر تو نہ ہو تو پھر کسی کافر کا دل لگے

دوزخ میں آرمیدہ ارم سے رمیدہ ہوں

اللہ ر کشاکش دیر و حرم کہ میں

ظالم ہزار ہاتھ سے دامن دریدہ ہوں

پروانہ پاس شمع کے بلبل ہے گل کے پاس

اک میں کہ تیری بزم میں خلوت گزیدہ ہوں

افتادگی پہ بھی نہ گئی اس کی جستجو

گویا زمیں پہ سایۂ مرغ پریدہ ہوں

اے آرزوئے تازہ نہ کر مجھ سے چھیڑ چھاڑ

میں پائے شوق و دست تمنا بریدہ ہوں

اے داغؔ جس کے واسطے روز جزا بنا

وہ کون ہے وہ میں ہی تو آفت رسیدہ ہوں

soz-o-gudaz-e-ishq ka lazzat chashida hun

manind-e-abla hama tan ab dida hun

gar to na ho to phir kisi kafir ka dil lage

dozakh mein armida iram se ramida hun

allah r kashakash-e-dair-o-haram ke main

zalim hazar hath se daman darida hun

parwana pas shama ke bulbul hai gul ke pas

ik main ke teri bazm mein khalwat gazida hun

uftadagi pe bhi na gai us ki justuju

goya zamin pe saya-e-murgh-e-parida hun

ai arzu-e-taza na kar mujh se chher chhar

main pae shauq-o-dast-e-tamanna burida hun

ai dagh jis ke waste roz-e-jaza bana

wo kaun hai wo main hi to afat rasida hun