سوز دل کا ذکر اپنے منہ پہ جب لاتے ہیں ہم

سوز دل کا ذکر اپنے منہ پہ جب لاتے ہیں ہم

شمع ساں اپنی زباں سے آپ جل جاتے ہیں ہم

دم بدم اس شوخ کے آزردہ ہو جانے سے آہ

جب نہیں کچھ اپنا بس چلتا تو گھبراتے ہیں ہم

بیٹھنے کو تو نہیں آئے ہیں یاں اے باغباں

کیوں خفا ہوتا ہے اتنا ہم سے تو جاتے ہیں ہم

دل سے ہم چھٹ جائیں یا دل ہم سے چھٹ جاوے کہیں

اس کے الجھیڑے سے اب تو سخت اکتاتے ہیں ہم

دل خدا جانے کدھر گم ہو گیا اے دوستاں

ڈھونڈھتے پھرتے ہیں کب سے اور نہیں پاتے ہیں ہم

دونوں دیوانے ہیں کیا سمجھیں گے آپس میں عبث

ہم کو سمجھاتا ہے دل اور دل کو سمجھاتے ہیں ہم

یاد میں اس گلبدن کی آج کل تو اے حسنؔ

باغ میں پھر پھر کے اپنے دل کو بہلاتے ہیں ہم

soz-e-dil ka zikr apne munh pe jab late hain ham

shama san apni zaban se ap jal jate hain ham

dam badam us shokh ke azurda ho jane se ah

jab nahin kuchh apna bas chalta to ghabrate hain ham

baithne ko to nahin ae hain yan ai baghban

kyun khafa hota hai itna ham se to jate hain ham

dil se ham chhut jaen ya dil ham se chhut jawe kahin

us ke aljhere se ab to sakht uktate hain ham

dil khuda jane kidhar gum ho gaya ai dostan

dhundhte phirte hain kab se aur nahin pate hain ham

donon diwane hain kya samjhenge apas mein abas

ham ko samjhata hai dil aur dil ko samjhate hain ham

yad mein is gulbadan ki aj kal to ai husn

bagh mein phir phir ke apne dil ko bahlate hain ham