سلطانی

کسے خبر کہ ہزاروں مقام رکھتا ہے

وہ فقر جس میں ہے بے پردہ روحِ قُرآنی

خودی کو جب نظر آتی ہے قاہری اپنی

یہی مقام ہے کہتے ہیں جس کو سُلطانی

یہی مقام ہے مومن کی قُوّتوں کا عیار

اسی مقام سے آدم ہے ظِلّ سُبحانی

یہ جبر و قہر نہیں ہے، یہ عشق و مستی ہے

کہ جبر و قہر سے ممکن نہیں جہاں بانی

کِیا گیا ہے غلامی میں مبتلا تجھ کو

کہ تجھ سے ہو نہ سکی فقر کی نگہبانی

مثالِ ماہ چمکتا تھا جس کا داغِ سجود

خرید لی ہے فرنگی نے وہ مسلمانی

ہوا حریفِ مہ و آفتاب تُو جس سے

رہی نہ تیرے ستاروں میں وہ دُرخشانی

kise khabar ke hazaron maqam rakhta hai

wo faqr jis mein hai be parda ruh-e-qurani

khudi ko jab nazar ati hai qahiri apni

yahi maqam hai kahte hain jis ko sultani

yahi maqam hai momin ki quwwaton ka ayyar

usi maqam se adam hai zill-e-subhani

ye jabr-o-qahr nahin hai, ye ishq-o-masti hai

ke jabr-o-qahr se mumkin nahin jahan bani

kiya gaya hai ghulami mein mubtala tujh ko

ke tujh se ho na saki faqr ki nigahbani

misal-e-mah chamakta tha jis ka dagh-e-sujud

kharid li hai farangi ne wo musalmani

hawa harif-e-mah-o-aftab tu jis se

rahi na tere sitaron mein wo darakhshani