آئے بھی تو وہ منہ کو چھپائے مرے آگے

آئے بھی تو وہ منہ کو چھپائے مرے آگے

اس طرح سے آئے کہ نہ آئے مرے آگے

بجھتے ہوئے دیکھوں گا نہ میں دل کی لگی کو

کوئی نہ کبھی شمع بجھائے مرے آگے

تیور یہی کہتے تھے کہ یہ نام ہے میرا

لکھ کر کئی حرف اس نے مٹائے مرے آگے

بچھڑے ہوئے معشوق ملیں سب کو الٰہی

تنہا کوئی جنت میں نہ جائے مرے آگے

کچھ داغؔ کا مذکور جو آیا تو وہ بولے

آئے تھے برا حال بنائے مرے آگے

ae bhi to wo munh ko chhupae mire age

is tarah se ae ke na ae mire age

bujhte hue dekhunga na main dil ki lagi ko

koi na kabhi shama bujhae mire age

tewar yahi kahte the ke ye nam hai mera

likh kar kai harf us ne mitae mire age

bichhre hue maashuq milen sab ko ilahi

tanha koi jannat mein na jae mire age

kuchh dagh ka mazkur jo aya to wo bole

ae the bura hal banae mire age