سیاہی جیسے گر جائے دم تحریر کاغذ پر

سیاہی جیسے گر جائے دم تحریر کاغذ پر

مری قسمت میں یوں تصویر ہے شب ہاۓ ہجراں کی

کہوں کیا گرم جوشی مے کشی میں شعلہ رویاں کی

کہ شمع خانۂ دل آتش مے سے فروزاں کی

ہمیشہ مجھ کو طفلی میں بھی مشق تیرہ روزی تھی

سیاہی ہے مرے ایام میں لوح دبستاں کی

دریغ! آہ سحر گہ کار باد صبح کرتی ہے

کہ ہوتی ہے زیادہ سرد مہری شمع رویاں کی

مجھے اپنے جنوں کی بے تکلف پردہ داری تھی

ولیکن کیا کروں آوے جو رسوائی گریباں کی

ہنر پیدا کیا ہے میں نے حیرت آزمائی میں

کہ جوہر آئینہ کا ہر پلک ہے چشم حیراں کی

خدایا کس قدر اہل نظر نے خاک چھانی ہے

کہ ہیں صد رخنہ جوں غربال دیواریں گلستاں کی

ہوا شرم تہی دستی سے سے وہ بھی سرنگوں آخر

بس اے زخم جگر اب دیکھ لے شورش نمکداں کی

بیاد گرمیٔ صحبت بہ رنگ شعلہ دہکے ہے

چھپاؤں کیونکہ غالبؔ سوزشیں داغ نمایاں کی

جنوں تہمت کش تسکیں نہ ہو گر شادمانی کی

نمک پاش خراش دل ہے لذت زندگانی کی

کشاکش‌ ہاۓ ہستی سے کرے کیا سعی آزادی

ہوئی زنجیر موج آب کو فرصت روانی کی

نہ کھینچ اے سعیٔ دست نارسا زلف تمنا کو

پریشاں تر ہے موئے خامہ سے تدبیر مانی کی

کہاں ہم بھی رگ و پے رکھتے ہیں انصاف بہتر ہے

نہ کھینچے طاقت خمیازہ تہمت ناتوانی کی

تکلف برطرف فرہاد اور اتنی سبکدستی

خیال آساں تھا لیکن خواب خسرو نے گرانی کی

پس از مردن بھی دیوانہ زیارت گاہ طفلاں ہے

شرار سنگ نے تربت پہ میری گل فشانی کی

اسدؔ کو بوریے میں دھر کے پھونکا موج ہستی نے

فقیری میں بھی باقی ہے شرارت نوجوانی کی

siyahi jaise gir jae dam-e-tahrir kaghaz par

miri qismat mein yun taswir hai shab hae hijran ki

kahun kya garm joshi mai kashi mein shola rawiyan ki

ke sham-e-khana-e-dil atish-e-mai se farozan ki

hamesha mujh ko tifli mein bhi mashq-e-tira rozi thi

siyahi hai mire ayyam mein lauh-e-dabistan ki

daregh! ah-e-sahar gah kar-e-bad-e-subh karti hai

ke hoti hai ziyada sard mehri sham-e-rawiyan ki

mujhe apne junun ki be takalluf parda dari thi

walekin kya karun awe jo ruswai gareban ki

hunar paida kya hai main ne hairat azmai mein

ke jauhar aina ka har palak hai chashm-e-hairan ki

khudaya kis qadar ahl-e-nazar ne khak chhani hai

ke hain sad rakhna jun ghirbal diwaren gulistan ki

hawa sharm-e-tahi dasti se se wo bhi sarnigun akhir

bas ai zakhm-e-jigar ab dekh le shorish namakdan ki

bead-e-garmi-e-sohbat ba rang-e-shola dahke hai

chhupaun kyunke ghalib sozishen dagh-e-numayan ki

junun tohmat kash-e-taskin na ho gar shadmani ki

namak pash-e-kharash-e-dil hai lazzat-e-zindagani ki

kashakash ha-e-hasti se kare kya sai-e-azadi

hui zanjir mauj-e-ab ko fursat rawani ki

na khinch ai sai-e-dast-e-narasa zulf-e-tamanna ko

pareshan tar hai mu-e-khama se tadbir mani ki

kahan ham bhi rag-o-pe rakhte hain insaf behtar hai

na khinche taqat-e-khamyaza tohmat natawani ki

takalluf bartaraf farhad aur itni subukdasti

khayal asan tha lekin khwab-e-khusrau ne girani ki

pas az murdan bhi diwana ziyarat gah-e-tiflan hai

sharar-e-sang ne turbat pe meri gul fishani ki

asad ko borye mein dhar ke phunka mauj-e-hasti ne

faqiri mein bhi baqi hai shararat naujawani ki