Arooz is now on the App Store, for iPhone and iPad. Download →

All poetry

سو حسرتیں تو آئیں گیا ایک دل گیا

Dagh Dehlvi (1831–1905)

سو حسرتیں تو آئیں گیا ایک دل گیا

ملنا تھا جو مجھے مری قسمت کا مل گیا

اس نے لیا جو آئنے میں بوسہ اپنا آپ

اللہ رے نازکی لب گلفام چھل گیا

اللہ رے جامہ زیب تری جامہ زیبیاں

پہنا جو تو نے رنگ وہی رنگ کھل گیا

جنت اسی کا نام اگر ہے تو بس سلام

محفل میں تیری جو کوئی آیا خجل گیا

میں نے تو اپنے واسطے کی تھی دعائے وصل

الٹا اثر ہوا وہ رقیبوں سے مل گیا

ہستی میں ہیں عدم کے مزے عاشقوں کو داغؔ

قالب میں جان آتے ہی پہلو سے دل گیا