سنے راتوں کوں گر جنگل میں میرے غم کی واویلا

سنے راتوں کوں گر جنگل میں میرے غم کی واویلا

تو مجنوں قبر سیں اٹھ کر پکارے آہ یا لیلیٰ

ہمارا خون ناحق نیں ہوا ضائع ارے قاتل

زمیں سے گل ہو نکلا آسماں پر ہو شفق پھیلا

ہرن سب ہیں براتی اور دوانہ بن کا دولہا ہے

بہ ہر خلعت کوں عریانی کی پھرتا ہے بنا چھیلا

شراب صاف دے تا صاف ہو ساقی غبار غم

ہمارا دل نپٹ گرد کدورت سے ہے اب میلا

سراجؔ اس شعلہ رو کی تنگ پوشی کوں کہاں پہنچے

کہ ہے جامہ بدن میں شمع کے فانوس کا ڈھیلا

sune raton kun gar jangal mein mere gham ki wawaila

tu majnun qabr sin uth kar pukare ah ya laila

hamara khun-e-nahaq nain hua zae are qatil

zamin se gul ho nikla asman par ho shafaq phaila

hiran sab hain barati aur diwana ban ka dolaha hai

ba har khilat kun uryani ki phirta hai bana chhila

sharab-e-saf de ta saf ho saqi ghubar-e-gham

hamara dil nipat gard-e-kudurat se hai ab maila

siraj is shola ro ki tang poshi kun kahan pahunche

ke hai jama badan mein shama ke fanus ka dhila