آئیے جلوۂ دیدار کے دکھلانے کو

آئیے جلوۂ دیدار کے دکھلانے کو

پھونک دے برق تجلی مرے کاشانے کو

دیکھیے کون سی جا یار کا ملتا ہے پتہ

کوئی کعبے کو چلا ہے کوئی بت خانے کو

تیری فرقت میں تصور ہے یہ بے دردی کا

خواب ہم جانتے ہیں نیند کے آ جانے کو

بعد میرے جو ہوا دشت میں مجنوں کا گزر

رو دیا دیکھ کے خالی مرے ویرانے کو

کام آ جاتی ہے ہم بزمی بھی روشن دل کی

شمع ہم رنگ بنا لیتی ہے پروانے کو

آج پھر شہر کے کوچے نظر آتے ہیں اداس

کس طرف لے گئی وحشت ترے دیوانے کو

اے جنوں تنگ ہوئی وسعت صحرا تجھ سے

اب کہاں جائے طبیعت کوئی بہلانے کو

گل پہ بلبل تھا کہیں شمع پہ پروانہ تھا

ہم نے ہر رنگ میں دیکھا ترے پروانے کو

وا شد دل نہ ہوئی غنچۂ خاطر نہ کھلا

کون سے باغ میں آئے تھے ہوا کھانے کو

میں نے جب وادئ غربت میں قدم رکھا تھا

دور تک یاد وطن آئی تھی سمجھانے کو

aiye jalwa-e-didar ke dikhlane ko

phunk de barq-e-tajalli mire kashane ko

dekhiye kaun si ja yar ka milta hai pata

koi kaabe ko chala hai koi but khane ko

teri furqat mein tasawwur hai ye be dardi ka

khwab ham jante hain nind ke a jane ko

baad mere jo hua dasht mein majnun ka guzar

ro diya dekh ke khali mire wirane ko

kam a jati hai ham bazmi bhi raushan dil ki

shama ham rang bana leti hai parwane ko

aj phir shahr ke kuche nazar ate hain udas

kis taraf le gai wahshat tire diwane ko

ai junun tang hui wusat-e-sahra tujh se

ab kahan jae tabiat koi bahlane ko

gul pe bulbul tha kahin shama pe parwana tha

ham ne har rang mein dekha tire parwane ko

wa shud-e-dil na hui ghuncha-e-khatir na khula

kaun se bagh mein ae the hua khane ko

main ne jab wadi-e-ghurbat mein qadam rakha tha

dur tak yad-e-watan ai thi samjhane ko