سرسید کے مزار پر

چراغ علم روشن ہے حقیقت کی ہواؤں پر

حکومت کر رہا ہے ایک گوشے سے فضاؤں پر

یہ سر سبزی و شادابی جو ویرانی کا حاصل ہے

رگوں میں اس کی پوشیدہ تموج خیز اک دل ہے

ابھی تک خاک میں اس کی ہے جوش ارتقا باقی

لحد پر گھاس کے پتوں میں ہے نشوونما باقی

ابھی تک انجمن میں گونج باقی ہے صداؤں کی

ابھی تک کھیلتی ہے خاک سے شوخی ہواؤں کی

یہ بزم خواب سرسید یہ نقش عظمت رفتہ

مے ایثار سے لبریز ہے اک جام نورانی

محبت کی طرح آباد رکھے گا خدا اس کو

مٹا سکتی نہیں دنیائے حادث کی ہوا اس کو

میں ذوق علم لے کر تربت سید پر آیا ہوں

عقیدت کے شگفتہ پھول اپنے ساتھ لایا ہوں

تری وحشت لئے پھرتی ہے گرم جستجو مجھ کو

سکوں اندوز ہونے کی بہت ہے آرزو مجھ کو

فضاؤں میں محبت کی حقیقت آشنا ہوں میں

اک آغوش ادب میں پرورش پاتا رہا ہوں میں

بقدر ذوق تکمیل تمنا کی تمنا ہے

اسی آغوش میں معراج فردا کی تمنا ہے

تمنا ہے جہان علم میں چمکوں سہا بن کر

جمود ظلمت ہستی پہ چھا جاؤں ضیا بن کر

تمنا ہے کہ دنیا مجھ سے یکسر نور ہو جائے

یہ تاریکی سمٹ کر ایک دن کافور ہو جائے

تمنا ہے کہ سرسید بنوں یا شبلیؔ و حالیؔ

کہ ان ارباب محفل کی ابھی تک ہے جگہ خالی

الٰہی خاک سرسید سے کچھ چنگاریاں دے دے

مذاق دل ترستا ہے تپش سامانیاں دے دے

مری قسمت میں اس مے خانے کا ساغر نہیں یا رب

عوض میں اس کے مجھ کو مشرب پیر مغاں دے دے

جہاں اک طائر سدرہ کسی دن چہچہایا تھا

انہیں شاخوں پہ مجھ کو اختیار آشیاں دے دے

جو میرے ساز فطرت میں نیا اک سوز بھرنا ہے

تو جوہرؔ اور ظفرؔ کیسی زبان نغمہ خواں دے دے

مجھے درکار ہے پھر ملک و ملت کی حدی خوانی

نذیرؔ و شبلیؔ و حالیؔ کا انداز بیاں دے دے

غبار رہ گزار دہر میں آلودگی کب تک

مرے زریں تصور کو بساط کہکشاں دے دے

دماغ و ذہن میں اک جنگ برپا ہے خیالوں کی

اسے ہموار کر کے اک سکون جاوداں دے دے

اگر ہے قافلے کے ساتھ چلنا میرا نا ممکن

تو مجھ کو رہنما کر دے مجھے اک کارواں دے دے

زمیں پر پاؤں پھیلانے کی گنجائش اگر کم ہے

مجھے بادل بنا دے سیر کو اک آسماں دے دے

اگر تخئیل سرسید ہے اب گلدستۂ ماضی

جوانی کی امنگوں کو نئی انگڑائیاں دے دے

پیام کامیابی دے مجھے ایوان رفعت سے

میں خالی ہاتھ جا سکتا نہیں سید کی تربت سے

charagh-e-ilm raushan hai haqiqat ki hawaon par

hukumat kar raha hai ek goshe se fazaon par

ye sar sabzi-o-shadabi jo wirani ka hasil hai

ragon mein us ki poshida tamawwuj khez ik dil hai

abhi tak khak mein us ki hai josh-e-irtiqa baqi

lahad par ghas ke patton mein hai nashwonuma baqi

abhi tak anjuman mein gunj baqi hai sadaon ki

abhi tak khelti hai khak se shokhi hawaon ki

ye bazm-e-khwab sarsayyad ye naqsh-e-azmat-e-rafta

mai isar se labrez hai ik jam nurani

mohabbat ki tarah abad rakhega khuda us ko

mita sakti nahin duniya-e-hadis ki hawa us ko

main zauq-e-ilm le kar turbat-e-sayyad par aya hun

aqidat ke shagufta phul apne sath laya hun

tiri wahshat liye phirti hai garm-e-justuju mujh ko

sukun andoz hone ki bahut hai arzu mujh ko

fazaon mein mohabbat ki haqiqat ashna hun main

ik aghosh-e-adab mein parwarish pata raha hun main

baqadr-e-zauq-e-takmil-e-tamanna ki tamanna hai

isi aghosh mein meraj-e-farda ki tamanna hai

tamanna hai jahan-e-ilm mein chamkun saha ban kar

jumud-e-zulmat-e-hasti pe chha jaun ziya ban kar

tamanna hai ke duniya mujh se yaksar nur ho jae

ye tariki simat kar ek din kafur ho jae

tamanna hai ke sarsayyad banun ya shabli-o-hali

ke un arbab-e-mahfil ki abhi tak hai jagah khali

ilahi khak sarsayyad se kuchh chingariyan de de

mazaq-e-dil tarasta hai tapish samaniyan de de

miri qismat mein is mai khane ka saghar nahin ya rab

ewaz mein us ke mujh ko mashrab-e-pir-e-mughan de de

jahan ik tair-e-sidra kisi din chahchahaya tha

unhen shakhon pe mujh ko ikhtiyar-e-ashiyan de de

jo mere saz-e-fitrat mein naya ik soz bharna hai

tu jauhar aur zafar kaisi zaban-e-naghma khwan de de

mujhe darkar hai phir mulk-o-millat ki hadi khwani

nazir-o-shabli-o-hali ka andaz-e-bayan de de

ghubar-e-rah guzar-e-dahr mein aludagi kab tak

mire zarrin tasawwur ko bisat-e-kahkashan de de

dimagh-o-zehn mein ik jang barpa hai khayalon ki

use hamwar kar ke ik sukun-e-jawedan de de

agar hai qafile ke sath chalna mera na mumkin

tu mujh ko rahnuma kar de mujhe ik karwan de de

zamin par paon phailane ki gunjaish agar kam hai

mujhe badal bana de sair ko ik asman de de

agar takhil sarsayyad hai ab guldasta-e-mazi

jawani ki umangon ko nai angraiyan de de

payam-e-kamyabi de mujhe aiwan-e-rifat se

main khali hath ja sakta nahin sayyad ki turbat se