سراپا حسن سمدھن گویا گلشن کی کیاری ہے

سراپا حسن سمدھن گویا گلشن کی کیاری ہے

پری بھی اب تو بازی حسن میں سمدھن سے ماری ہے

کھنچی کنگھی گندھی چوٹی جمی پٹی لگا کاجل

کماں ابرو نظر جادو نگہ ہر اک دلاری ہے

جبیں مہتاب آنکھیں شوخ شیریں لب گہر دنداں

بدن موتی دہن غنچہ ادا ہنسنے کی پیاری ہے

نیا کم خواب کا لہنگا جھمکتے تاش کی انگیا

کچیں تصویر سی جن پہ لگا گوٹا کناری ہے

ملائم پیٹ مخمل سا کلی سی ناف کی صورت

اٹھا سینہ صفا پیڑو عجب جوبن کی ناری ہے

سریں نازک کمر پتلی خط گل زار روما دل

کہوں کیا آگے اب اس کے مقام پردہ داری ہے

لٹکتی چال مدھ ماتی چلے بچھوں کو جھنکاتی

ادا میں دل لیے جاتی عجب سمدھن ہماری ہے

بھرے جوبن پہ اتراتی جھمک انگیا کی دکھلاتی

کمر لہنگے سے بل کھاتی لٹک گھونگھٹ کی بھاری ہے

sarapa husn samdhun goya gulshan ki kiyari hai

pari bhi ab to bazi husn mein samdhun se mari hai

khinchi kanghi gandhi choti jami piti laga kajal

kaman abru nazar jadu nigah har ik dulari hai

jabin mahtab ankhen shokh-e-shirin lab guhar dandan

badan moti dahan ghuncha ada hansne ki pyari hai

naya kam khwab ka lahnga jhamakte tash ki angiya

kachen taswir si jin pe laga gota kinari hai

mulaim pet makhmal sa kali si naf ki surat

utha sina safa pero ajab joban ki nari hai

saren nazuk kamar putli khat-e-gul zar roma dil

kahun kya age ab us ke maqam-e-parda dari hai

latakti chal madh mati chale bachhon ko jhanakiti

ada mein dil liye jati ajab samdhun hamari hai

bhare joban pe itrati jhamak angiya ki dikhlati

kamar lahnge se bal khati latak ghunghat ki bhari hai