سخت دشوار ہے پہلو میں بچانا دل کا

سخت دشوار ہے پہلو میں بچانا دل کا

کچھ نگاہوں سے برستا ہے چرانا دل کا

ہائے دل اور دل زار کے ہم سے برتاؤ

اور پھر تم سے دل زار پہ آنا دل کا

شمع سے زینت پہلو ہے نہ پروانے سے

تم کو منظور ہے ہر طرح جلانا دل کا

ناصحو زلف کے الجھاؤ برے ہوتے ہیں

کچھ ہنسی کھیل سمجھتے ہو چھڑانا دل کا

قہر ڈھائے ترے اظہار تمنا نے ظہیرؔ

حال کہتا ہے کسی سے کوئی دانا دل کا

sakht dushwar hai pahlu mein bachana dil ka

kuchh nigahon se barasta hai churana dil ka

hae dil aur dil-e-zar ke ham se bartao

aur phir tum se dil-e-zar pe ana dil ka

shama se zinat-e-pahlu hai na parwane se

tum ko manzur hai har tarah jalana dil ka

naseho zulf ke uljhao bure hote hain

kuchh hansi khel samajhte ho chhurana dil ka

qahr dhae tire izhar-e-tamanna ne zahir

hal kahta hai kisi se koi dana dil ka