سختیاں کرتا ہوں دل پر، غیر سے غافل ہوں میں

سختیاں کرتا ہوں دل پر، غیر سے غافل ہوں میں

ہائے کیا اچھّی کہی ظالم ہوں میں، جاہل ہوں میں

میں جبھی تک تھا کہ تیری جلوہ پیرائی نہ تھی

جو نمودِ حق سے مٹ جاتا ہے وہ باطل ہوں میں

علم کے دریا سے نِکلے غوطہ زن گوہر بدست

وائے محرومی! خزف چینِ لبِ ساحل ہوں میں

ہے مری ذلّت ہی کچھ میری شرافت کی دلیل

جس کی غفلت کو مَلَک روتے ہیں وہ غافل ہوں میں

بزمِ ہستی! اپنی آرائش پہ تُو نازاں نہ ہو

تُو تو اک تصویر ہے محفل کی اور محفل ہوں میں

ڈھُونڈتا پھرتا ہوں اے اقبالؔ اپنے آپ کو

آپ ہی گویا مسافر، آپ ہی منزل ہوں میں

sakhtiyan karta hun dil par, ghair se ghafil hun main

hae kya achchhi kahi zalim hun main, jahil hun main

main jabhi tak tha ke teri jalwa pairai na thi

jo numud-e-haq se mit jata hai wo batil hun main

ilm ke dariya se nikle ghauta zan gauhar badast

wae mahrumi! khazaf chain-e-lab-e-sahil hun main

hai miri zillat hi kuchh meri sharafat ki dalil

jis ki ghaflat ko malak rote hain wo ghafil hun main

bazm-e-hasti! apni araish pe tu nazan na ho

tu to ik taswir hai mahfil ki aur mahfil hun main

dhundta phirta hun ai iqbal apne ap ko

ap hi goya musafir, ap hi manzil hun main